АКУПАНЦКІ “ОПЛОТ”
Прадастаўляем вашай увазе фрагмэнт артыкула пад тытулам “Я вас победю и передам милиции” з расейскай інтэрнэт-газэты Lenta.ru ад 3 лютага.
Працу міліцыі па зачыстцы абласной рады ў Палтаве гатовыя ўзяць на сябе суседзі палтаўчанаў: у Харкаве прыйсьці на дапамогу ўладам гатовыя члены мясцовага байцоўскага клюба “Оплот”. “Мы зараз ствараем атрады хуткага рэагаваньня, якія пасьля звароту да нас будуць выязджаць і адбіваць захопленыя нацыяналістамі адміністрацыйныя будынкі”, — распавядае мне лідэр “Оплота” Евгеній Жілін. Ён не выключае, што першая такая паездка будзе менавіта ў Палтаўскую вобласьць, хаця планы ў яго маштабныя: “З часам мы вызвалім усе вобласьці Ўкраіны, якія да нас зьвернуцца”.
У Палтаве разумеюць, што знаходзяцца ў авангардзе рэвалюцыйнага змаганьня і рыхтуюцца адбіць напад байцоў Жіліна. “Няхай прыязджаюць, мы ўтварылі сотні самаабароны, гатовыя даць адлуп”, — усьміхаецца Раман Чабаноўскі, старшыня палтаўскага аддзяленьня нацыянальнай арганізацыі “Свобода”.
Унутры “Оплота” паўсюль вісяць баксёрскія грушы, якія лупцуе кожны, хто праходзіць міма. Тут чалавек пяцьдзесят, некаторыя ходзяць з арматурай у руках. “Оплот” — гэта ня проста спартовы клюб, дзе па выходных праходзяць баі без правілаў, а цэлая бізнэс-імпэрыя. У яе ўваходзяць аўдытарская кампанія, інфармацыйная агенцыя “Оплот-інфо”, рэстаран і нават алнайменны гіпэрмаркет нізкіх коштаў. Сам будынак спортклюба, распавядае адзін з байцоў, быў пабудаваны “за сем мільёнаў даляраў”, і клюбу яго падарылі “нейкія спартоўцы”.
Утварыў “Оплот” былы УБОПавец Евгеній Жілін. У сваёй аўтабіяграфіі ён піша, што ў 2010 годзе звольніўся з ворганаў унутраных спраў на ўласнае жаданьне. У Харкаве, праўда, кажуць, што Жіліна звольнілі па падазрэньню ў падвойным забойстве, узялі пад арышт, але з прычыны адсутнасьці доказаў выпусьцілі. “Потым зь ім зьвязвалі сьмерць журналіста Васіля Кляменцева, але й тады доказаў не знайшлі”, — распавядае мне сустаршыня Харкаўскай праабарончай групы Яўген Захараў. Потым у МУС назвалі імя вінавайцы, якім аказаўся іншы былы супрацоўнік харкаўскага УБОП Андрэй Козар.
Па словах Жіліна, “Оплот” мае 350 байцоў, а ўсяго іх у яго па Ўкраіне да дзьвюх тысячаў прыхільнікаў. Адказ на пытаньне, чаму байцоўскі клюб узяў на сябе функцыі па абароне горада, заварожвае: “Мы патрыёты ўкраінскай нацыі. Кожны кайфуе па-рознаму. Нехта купляе яхты і самалёты, нехта купіў для дзесяці каханак па дыямэнту. А я ня так люблю сваіх дзяцей, жонку, тату і маці, як сваю зямлю і свой народ. Мой абавязак як мужчыны абараняць сваю зямлю, і пакуль няма вайны, я павінен рыхтаваць людзей да абароны сваёй зямлі. Я ў гэта ўкладваю грошы і ад гэтага атрымліваю задавальненьне”, — тлумачыць мне Жілін сэнс новых задач сваёй арганізацыі. Увечары ён распускае байцоў па хатах. “Живи сильно”, — скандуюць байцы дэвіз “Оплота” і наладжваюць Жіліну авацыю.
“Мы абаронцы горада, дзяжурылі тут і былі гатовыя высоўвацца ў выпадку захопу адміністрацыі, але цяпер мы перамаглі, нашая трываласьць перамагла”, — кажа Жілін.
Ільля Азар
Пераклад з расейскай.
Вось такія “патрыёты ўкраінскай нацыі, што кайфуюць па-свойму”. У Харкаве, апанаваным антыдзяржаўнай цемрай, гэтыя “цітушкі” не баяцца рабіць сябе рэкламу і самаідэнтыфікавацца. Яны ўпэўненыя ў сваёй беспакаранасьці, як і іхны лідэр, крымінальныя злачынствы якога ў ворганах МУС “не былі даказаныя, але ён звольніўся”. Вось такая русскоязычная публіка пастаўлена на абарону прамаскоўскага рэжыму. Гэта ведаюць сапраўдныя ўкраінскія патрыёты і гатовыя змагацца з гэтай пошасьцю.
Сяргей Камароўскі