АГЛЯД ЗАМЕЖНАГА ДРУКУ (22.11–03.12.2013)

22 лістапада 2013 г. дацкая газэта “Berlingske” апублікавала рэцэнзію на дакумэнтальны фільм ангельскага рэжысёра Кэна Лока “Дух 45-га”. У стужцы дэманструюцца архіўныя кадры, а таксама расповеды людзей, якія ўспамінаюць пасьляваеннае жыцьцё. Усе кажуць, што пасьля вайны людзі падтрымлівалі адзін аднаго, дапамагалі ў бядзе і праблемах, быў іншы дух часу.

Наш камэнтар: Беларусы таксама ўспамінаюць (хто з уласных уражаньняў, хто з расповедаў старэйшых), што пасьля вайны людзі былі значна больш салідарнымі і чулымі да чужой бяды. Потым накаціў час адкрытага індывідуалізма, пыхі, самазадаволенасьці і абыякавасьці. Што здарылася з эўрапейскімі грамадзтвамі ў 1960-я гады?

26 лістапада швэдская газэта “Svenska Dagbladet” напісала пра вынікі сацыялагічнага дасьледваньня ў Вялікай Брытаніі. Вынікі паказалі, што за апошнія 20 гадоў колькасьць брытанскіх жанчын, якія маюць лесбійскія сэксуальныя кантакты, падвоілася.

Наш камэнтар: Зразумела, што гэта адбылося не само сабой. Гэта ёсьць жудасны вынік расперазанага лібэралізма, які апанаваў Эўропу. Людзі чамусьці не пытаюцца, а якая будучыня ў такой нацыі?

29 лістапада 2013 г. швайцарская газэта “Tribune de Geneve” паведаміла, што французкі суддзя Марк Трэдзівік атрымаў з Алжыра дазвол на правядзеньне мэдычна-крымінальнай экспэртызы галоў 20 каталіцкіх манахаў. У 1996 г. манахаў захапілі ў кляштары на поўдні Алжыра і адсеклі ім галовы баевікі-ісламісты.

Наш камэнтар: Пакутніцкая сьмерць хрысьціянскіх манахаў нічаму не навучыла Эўропу. Вось што адбываецца з хрысьціянамі на мусульманскім Усходзе. У той самы час брамы Эўропы адкрытыя для ўсходніх экзотаў, якія ненавідзяць усё хрысьціянскае і эўрапейскае. Абсурд.

29 лістапада 2013 г. румынская газэта “Evenimentul Zilei” паведаміла, што Сэнат Бэльгіі прыняў на разгляд праект закона аб эўтаназіі непаўнагадовых асобаў. Дзеля акту эўтаназіі спатрэбіцца цяпер рашэньне мэдкансіліюма і згода бацькоў. Супраць прыняцьця закона з усіх партый выступаюць толькі фламандскія і валонскія цэнтрысты-дэмахрысьціяне.

Наш камэнтар: Лібэралізм трыюмфуе. Зразумела таксама, хто супраць гэтага закона.

29 лістапада 2013 г. швайцарская газэта “Neue Zuercher Zeitung” напісала з Масквы. На Чырвонай плошчы пабудавалі былі нядаўна рэкламны павільён на грошы французкага канцэрна “Люі Вьютон”. Павільён мае выгляд чамадана прадукцыі гэтага канцэрна і ўражальныя памеры: 30 м даўжынёй і 9 м вышынёй. Ніхто з маскоўскіх уладаў не прызнаецца, што даў згоду на пабудову гэтага аб'екта на гістарычнай плошчы. Грамадзкасьць пратэстуе, патрабуе ліквідаваць недарэчнасьць.

Наш камэнтар: Заходнікам можна загружаць гэтыя інфармацыйныя “качкі” з Масквы бясконца. Постсавецкія людзі, аднак, добра ведаюць, што на Чырвонай плошчы без дазволаў нічога не будуецца, нават шпакоўню не дадуць павесіць. А тут, аказваецца, сам Пуцін ня ведаў. Затое як інтэлігентна выглядае маскоўска эстэт-публіка — яна супраць заходняга кічу на “плошчаді русской славы”!

Швайцарцаў можна дурыць гэтымі штучкамі, а вось беларусаў ня трэба.

3 сьнежня 2013 г. нідэрляндская газэта “De Telegraaf” паведаміла з Кіева, што ў выніку галасаваньня ў Вярхоўнай Радзе ўрад Азарава не пайшоў у адстаўку. Для такога рашэньня патрэбныя былі 226 галасоў, а вотум недаверу ўраду падтрымалі толькі 186 дэпутатаў. Газэта паведамляе пра дэманстрацыю ў нядзелю 350 тысячаў чалавек на плошчы Незалежнасьці.

Наш камэнтар: Вынікі галасаваньня можна зразумець. Частка дэпутатаў не галасавала. Зразумела таксама, што атрымаўшы шалёны хабар з Масквы (пра гэта вядома), гэтыя людзі ня могуць прымаць самастойныя рашэньні. Цікава таксама, што салідная нідэрляндская газэта карыстаецца маскоўскай статыстыкай кіеўскіх падзей. Вядома, што ў нядзелю на Майдане і вакол сабралося да мільёна ўкраінцаў.