АГЛЯД ЗАМЕЖНАГА ДРУКУ (12–19.07.2013)

12 ліпеня 2013 г. французкая газэта “La Crois” паведаміла, што ФСБ вярнулася да друкаваньня на пішмашынках, каб пазьбегнуць ўмяшальніцтва інтэрнэтпіратаў.

Наш камэнтар: Яны там на Лубянцы могуць хоць да гліняных таблічкак і клінапісу вярнуцца. Але нішто ўжо ня выратуе ад правалу іх і іхную імпэрыю.

14 ліпеня 2013 г. іспанская газэта “El Mundo” паведаміла з Каіра. Эгіпецкія ўлады вырашылі “замарозіць” фінансавыя сродкі, якія належаць 14 вядучым асобам Мусульманскага Брацтва і іхным хаўрусьнікам салафістам, арыштаваных апошнімі днямі.

Наш камэнтар: Дзеяньні ўладаў абсалютна законныя і лагічныя ў адносінах да тых, хто дзейнічаў на падрыў дзяржаўных асноваў краіны. Такія ж захады будуць прынятыя ў працэсе нармалізацыі дзяржаўнага жыцьця ў Беларусі.

16 ліпеня 2013 г. румынская газэта “Evenimentul Zilei” напісала пра Карэйскую вайну 1950-53 гг. Падчас той вайны больш за 10 тысячаў паўднёвакарэйскіх вайскоўцаў патрапілі ў палон на камуністычную Поўнач. Дагэтуль 500 зь іх не вярнуліся дахаты пасьля заключэньня замірэньня і заканчэньня вайны ў 1953 г. Паўночная Карэя заявіла была, што на яе тэрыторыі засталіся толькі тыя, хто сам гэтага захацеў.

Наш камэнтар: У Карэйскай вайне, распачатай камуністамі Кім Ір-Сэна на загад Сталіна, ваявалі беларусы, афіцэры і жаўнеры. Дагэтуль нічога не вядома пра гэтых людзей. Колькі іх было, хто зь іх загінуў, хто патрапіў у палон і г.д. Наперадзе праца беларускіх гісторыкаў над гэтай старонкай беларускай драмы.

18 ліпеня 2013 г. нарвэжская газэта “Aftenposten” паведаміла пра вынясеньне прысуду А. Навальнаму. Яму далі 5 гадоў турмы за зьнікненьне дзяржаўных грошай у Кіраве. 170 журналістаў прабіваліся ў залю паседжаньняў суда, дзе было 50 месцаў. Мяркуецца, што цяпер Навальны ня зможа кандыдаваць на прэзыдэнцкіх выбарах 2018 г. Летась ён заявіў, што хоча з блогэра стацца палітычным лідэрам.

Наш камэнтар: Летась блогэр заявіў і ўжо стаў — ды на поўную шпулю! Пра яго толькі й паведамляюць усе СМІ. І на поўным сур'ёзе называюць гэтага выскачку “лідэрам рускай апазыцыі”. Хаця такое мы ўжо перажылі з Мілінкевічам і іншымі. Кантора “венікаў ня вяжа” і ня сьпіць у шапку.

18 ліпеня 2013 г. румынская газэта “Adevarul” напісала пра нямецка-румынскія адносіны ў ІІ Сусьветную вайну. Гітлер казаў пра румынскую армію: “З румынамі нічога нельга зрабіць”.

Наш камэнтар: Вядомы пісьменьнік і ваенны журналіст Васіль Гросман пісаў у сваіх нататках пра Сталінград, як немцы зьдзекліва крычалі чырвонаармейцам на перадавой: “Мяняем аднаго румына на аднаго ўзбэка!”

Рэпутацыя ў адных і ў другіх хаўрусьнікаў была невысокая. А з другога боку, чаму румыны і ўзбэкі павінны былі высільвацца за Берлін і Маскву?

19 ліпеня румынская газэта “Evenimentul Zilei” напісала пра адказ Масквы на інтэрв'ю якое даў радыё “Вольная Эўропа” прэзыдэнт Румыніі Траян Бэсэску. Бэсэску рэзка выказваўся пра акупацыю правінцыі сувэрэннай Малдовы Трансністрыі (Прыднястроўя) расейскімі войскамі. Яму “давала адлуп” прэс-сакратарка МЗС РФ М. Захарава. Сярод іншага яна заявіла: “Мы трактуем гэтыя нападкі як некарэктныя і не па тэме. Пазыцыя Расеі пасьлядоўная і добра вядомая. Мы будзем працягваць з добрай воляй, незаангажавана і празрыста выконваць пасярэдніцкую місію ў працэсе перамоваў паміж Кішынёвам і Ціраспалем...”

Наш камэнтар: На такія заявы-“адлупы” былі вядомымі майстрамі таксама іншыя некалі ў Заходняй Эўропе.