АГЛЯД ЗАМЕЖНАГА ДРУКУ (20–23.06.2013)

20 чэрвеня 2013 г. польская газэта “Rzeczpospolita” напісала, што ЮНЕСКО ўключыла ў Сьпіс Сусьветнай Спадчыны базу дадзеных і экспанаты Музэю Галакосту Яд Вашэм у Ерузаліме.

Наш камэнтар: Беларусы павінны зрабіць усё магчымае для ўключэньня ў Сьпіс ЮНЕСКО Народнага Мэмарыялу ў Курапатах. Нельга дапусьціць, каб антынародны рэжым рукамі нячыстых прафанатараў наладзіў у нашай Сьвятыні рускі бардэль, парк “культуры і отдыха” і іншыя гнюснасьці.

21 чэрвеня 2013 г. латвійская газэта “Diena” напісала: “Расея адкінула прапанову прэзыдэнта ЗША Барака Абамы зьменшыць на траціну арсэнал ядзернай зброі ў абедзьвюх краінах. Расея назвала гэтую прапанову надта небясьпечнай. Экспэрты, камэнтуючы пазыцыю Масквы, патлумачылі, што ў Расеі арсэнал ядзернай зброі разглядаецца як гарантыя дзяржаўнай бясьпекі”.

Наш камэнтар: Расея рыхтуецца да вайны. Гэта відавочна.

21 чэрвеня 2013 г. швайцарская газэта “Neue Zuercher Zeitung” паведаміла, што ў розных бразільскіх гарадах на дэманстрацыі пратэсту выйшла да мільёну людзей. Яны пратэстуюць супраць карупцыі, сацыяльнай несправядлівасьці, патрабуюць рэфэрмаў у краіне. Адбыліся сутычкі з паліцыяй. Прэзыдэнт краіны Русеф адмяніла замежны візыт і засядае з крызісным камітэтам.

Наш камэнтар: А пачалося ўсё тыдзень таму з “драбніцы”. Моладзь ў сталіцы краіны выступіла супраць павышэньня коштаў на праезд у грамадзкім транспарце (такім чынам улады хацелі пакрыць выдаткі на правядзеньне Алімпійскіх гульняў у Бразіліі). Урад адмяніў павышэньне коштаў, але было ўжо позна, пайшла лавіна.

Беларусы таксама разумеюць і ведаюць, што антынацыянальны рэжым зьбіраецца пакрываць шалёныя выдаткі на непатрэбны чэмпіянат сьвету па хакею ў Менску з кішэняў людзей...

22 чэрвеня 2013 г. летувіская газэта “Lietuvos Rytas” напісала пра каўказкія справы Масквы. Нядаўна арыштаваны мэр сталіцы Дагэстана Махачкалы Саід Аміраў спрабаваў скончыць самагубствам у маскоўскай Ляфортаўскай турме. На працягу гадоў Масква засыпала яго ўзнагародамі. У той самы час на яго жыцьцё было арганізавана 15 пакушэньняў. Нядаўна яго арыштавалі і накіравалі этапам у Маскву. І так па ўсіх каўказкіх аўтаноміях, якія знаходзяцца пад уладай Масквы: мясцовыя царкі, карупцыя, народная нянавісьць да начальства, страляніна і выбухі. Масква зьбіраецца арганізаваць у гэтым рэгіёне Алімпійскія гульні.

Наш камэнтар: Усё большай колькасьці людзей у сьвеце становіцца зразумела: імпэрыя ня мае пэрспэктывы, і перш за ўсё пэрпэктывы існаваньня на Каўказе.

23 чэрвеня 2013 г. польская газэта “Gazeta Wyborcza” паведаміла, што міністар абароны Расеі Шайгу ўрачыста адкрыў “расейскі Арлінгтон” — могілкі ў Мыцішчах пад Масквой. Там будуць хаваць прэзыдэнтаў, герояў Расеі, генэралаў, адміралаў. Прымаць рашэньне будзе прэзыдэнт краіны. Абяцаюць з часам перанесьці туды пахаваньне Леніна і іншых генсекаў. Абвешчана, што месца хопіць для пахаваньняў на 200 гадоў.

Наш камэнтар: Можна сябе ўявіць, які гэта будзе стылёвы імпэрскі жах.

23 чэрвеня 2013 г. летувіская газэта “Kauno Diena” напісала пра тэатралізаваную рэканструкцыю эпізодаў паўстаньня 1863-64 гг. на стадыёне ў Каўнасе: “Тут была паказана карніцкая выправа Расейскай імпэрыі супраць летувіскіх і польскіх паўстанцаў”.

Наш камэнтар: Яны ў сваім рэпэртуары: нават не згадалі пра беларусаў, якія арганізавалі і змагаліся ў тым Паўстаньні. Гэта ж трэба, як заеў комплекс непаўнавартасьці. Можна толькі паспачуваць закамплексаваным.