АГЛЯД ЗАМЕЖНАГА ДРУКУ (22–26 САКАВІКА 2013)

22 сакавіка 2013 г. славацкая газэта “Hospodarske Noviny” напісала: “Расейскі прэзыдэнт Пуцін сёньня перад візытам новага кітайскага прэзыдэнта Сі Цынь-Пхінга ў Маскву заявіў, што партнэрства абедзьвюх краін спрыяе сусьветнай бясьпецы і дапамагае ствараць больш справядлівы сусьветны парадак”.

Наш камэнтар: Што да маскоўска-пэкінскага “новага парадку”, то беларусы ўжо зразумелі, што гэта такое. Гэта — зьнішчэньне нашай краіны мільённай ардой, якой па загаду з Масквы антыбеларускі рэжым пачынае засяляць нашу Беларусь. Расея ў сваю чаргу ўжо заглынула ў сваю касмічную чорную дзірку больш за мільён лепшых беларускіх работнікаў. І гэта толькі пачатак. Трэба бараніць Бацькаўшчыну ад гэтага “новага парадку”.

26 сакавіка 2013 г. аўстрыйская газэта “Der Standard” напісала пра рашэньне Арабскай Лігі. Ліга прыняла рашэньне, што месца Сірыі ў гэтай міжнароднай арганізацыі будзе займаць Сірыйская Нацыянальная Кааліцыя замест рэжыму Асада. Гэта зроблена ня толькі для таго, каб паваліць рэжым Асада, але і для таго, каб запабегчы прыйсьцю да ўлады радыкальных джыхадзістаў, якія ваююць супраць рэжыму.

Наш камэнтар: Калі народ змагаецца супраць прыгнёту, яго падтрымліваюць іншыя народы і прызнаюць змагарнае кіраўніцтва.

26 сакавіка 2013 г. швайцарская газэта “Neue Zuercher Zeitung” напісала пра справу Б. Беразоўскага. Пасьля ўскрыцьця паліцыя заявіла, што хутчэй за ўсё Беразоўскі скончыў жыцьцё самагубствам, ёсьць сьляды здушэньня.

Наш камэнтар: Усе цяпер тэарэтызуюць на розныя лады пра гэтую сьмерць мільярдэра. Многія беларусы ўспамінаюць, як гэты Беразоўскі і іншыя дзеячы на пачатку 90-х стваралі свае нячыстыя капіталы пад прыкрыцьцём Лубянкі. Некаторыя з мільярдэраў нават у палітыку схадзілі. Яны думалі, што Лубянка іх будзе ахоўваць і прыслугоўваць ім. А кантора адудзячыла іх па-свойму...

26 сакавіка 2013 г. нарвэжская газэта “Aftenposten” апублікавала артыкул пад тытулам “Швэдскія студэнты не разумеюць па-швэдску”. Дзевяць выкладчыкаў і дасьледчыкаў гісторыі з Упсальскага ўнівэрсітэта бьюць трывогу. Яны прэзэнтуюць вынікі сваіх назіраньняў: швэдскія студэнты слаба разумеюць сэнс лекцый, слаба ведаюць швэдскую граматыку, ня ўмеюць пераказаць пачутае, на лекцыях не натуюць, а пераважна робяць аўдыёзапісы. Праблема не ў паходжаньні ад імігрантаў. Якраз гэтыя маладыя людзі значна больш старанныя ў засваеньні швэдскай граматыкі, чым этнічныя швэды. Вінаватая швэдская школа, дзе ня могуць навучыць дзяцей. Нягледзячы на тое, што камуны ўкладаюць усё большыя сродкі ў мясцовае школьніцтва. Трэба праводзіць сур'ёзную рэформу школы.

Наш камэнтар: Вось і швэды даскакаліся з сваім сацыялізмам і лібэралізмам, дзе “хто як хоча, так і сакоча”. З малога швэды адвучваюцца ад строгіх патрабаваньняў жыцьця, канкурэнцыі, дысцыпліны. Замест хваляваньня пра падзеньне адукацыі, улады хвалююца пра “правы сэксменшасьцяў” і “роўнасьць палоў”. Збочаная сацыяльна-псіхічная мадэль эўралібэралізма дае свой цяжкі плён.

26 сакавіка 2013 г. славацкая газэта “SME” паведаміла з Расеі. Уладны праект “Цьвярозая Расея” правёў сацыялагічнае апытаньне 23 і 24 сакавіка ў 42 расейскіх рэгіёнах наконт падвышэньня ўзросту, калі можна піць алкаголь. 76% расейцаў за тое, каб гэты ўзрост падвысіць з 19 да 21 года. Пуцін, а перад ім Медведев дэманстравалі сваю барацьбу супраць пашыранага алкагалізму.

Наш камэнтар: Славацкая газэта толькі забылася паведаміць, колькі рэспандэнтаў гэтага апытаньня былі цьвярозымі на момант апытаньня. Дадзеныя перапісаны з крамлёўскай статыстыкі пра “барацьбу з пьянствам”. Усё выглядае прыстойна. Улада бораецца за цьвярозасьць...

Чарговы крамлёўскі прапаганд-міф пайшоў гуляць па заходніх СМІ. Дастаткова, аднак, толькі апынуцца ў любым з рэгіёнаў Расеі, каб убачыць дзікую і пьяную рэчаіснасьць імпэрыі.

26 сакавіка 2013 г. польская газэта “Rzeczpospolita” напісала: “Нямецкі МЗС выклікаў паўнамоцнага прадстаўніка амбасады Расеі ў Берліне, каб выказаць пратэст супраць праверак, якія расейскія ўлады праводзяць у сядзібах няўрадавых арганізацый, у тым ліку ў нямецкіх палітычных фундацыях у Расеі”. Сярод іншага былі праведзены праверкі расейскай пракуратурай і МУС у бюро Фонда ім. Конрада Адэнаўэра ў Санк-Пецярбузе і ў Фондзе Эбэрта ў Маскве. Кіраўнік нямецкага МЗС Вэстэрвэле назваў гэта “аблавай” на арганізацыі па правах чалавека ў Расеі.

Наш камэнтар: Зразумела, што “аблава” рэч непрыгожая. Але і ў Беларусі, і ў Расеі многім людзям вядома, што ў асяродку няўрадавых арганізацый пануе карупцыя і фальш. Што да нямецкіх фондаў Адэнаўэра і Эбэрта, то ў Беларусі яны ўславіліся сваёй актыўнай фінансавай падтрымкай псэўдаапазыцыйных структурак, утвораных Гансам Вікам з вінцучкоў-мілінкевічаў-саннікавых і падобных. Вынік іх дзейнасьці — суцэльная шкода і ўзбагачэньне жулікаў. Справа патрыёта Сяргея Каваленкі паказала, наколькі ўсё згніло ў праваабарончых структурках. Ахвяру жорсткіх палітычных рэпрэсій рэжыму гэтыя “праваабаронцы” нават не прызналі ахвярай.

Спачуваньня гэтыя структуркі не заслужылі.