АГЛЯД ЗАМЕЖНАГА ДРУКУ (13–17.11.2012 Г.)

13 лістапада 2012 г. румынская газэта “Adevarul” апублікавала чарговы артыкул з сэрыі “Жыцьцё Чаўшэску”. Гаворка вядзецца пра зьнешнепалітычную дзейнасьць румынскага дыктатара. На пачатку свайго кіраваньня Чаўшэску заявіў пра незалежнасьць Румыніі ад СССР і КПСС. Яго прымалі ў розных краінах як лідэра незалежнай дзяржавы і ён прымаў важных гасьцей. На здымку ў газэце — Чаўшэску з Дэ Голем едуць у аўтамабілі пасярод радасных натоўпаў у румынскім горадзе Краёве.

Наш камэнтар: З задэкляраванай “незалежнасьці ад Масквы” шмат што, на самой справе, было пустой дэклярацыяй. Але нават пры дзікім рэжыме Чаўшэску не зьнішчалася румынская мова, не праводзілася палітыка этнацыду і лінгвіцыду. Наадварот, Чаўшэску пазыцыянаваў сябе як нацыянальнага дыктатара, гэта быў пэрыяд актыўнага нацыяналізму. Такое нават блізка нельга параўнаць з лукашызмам — формай зьнішчэньня беларускага народу, нашай нацыянальнай культуры і цывілізацыі, формай агрэсіўнай русіфікацыі.

17 лістапада 2012 г. чэшская газэта “Ceske Noviny” паведаміла з Францыі. Там адбыліся масавыя дэманстрацыі супраць прыняцьця закону аб легалізацыі аднаполых шлюбаў. У розных гарадах дэманстравала разам больш за 100 тысячаў чалавек.

Наш камэнтар: Хрысьціянскае грамадзтва бароніцца ад Садома і Гаморы. Змаганьне за нармальнасьць.

17 лістапада 2012 г. аўстрыйская газэта “Die Presse” напісала пра вэрдыкты ў Міжнародным трыбунале ААН па ваенных злачынствах. Два харвацкіх генэралы апраўданы і вызвалены з-пад варты. На першым працэсе ім прысудзілі па 24 і 18 гадоў турмы. Сэрбія выказвае пратэст.

Наш камэнтар: Калі сэрбская хунта Мілошавіча распачынала зьнішчальную вайну супраць народаў у 1991 годзе, імпэрцы заручыліся падтрымкай Масквы і Берліна. Хунта пацярпела сакрушальную паразу ад арміяў народаў, якія хацелі вырвацца з югаслаўскай імпэрыі. Генэралы гэтых арміяў змагаліся супраць імпэрскіх агрэсараў. Іх вызваленьне віталі ў Харватыі сотні тысячаў людзей, якія выйшлі на плошчы гарадоў пад нацыянальнымі сьцягамі.

17 лістапада 2012 г. швайцарская газэта “Neue Zuercher Zeitung” напісала з Парыжа. Прэзыдэнт Францыі Аланд прыняў у Элісэйскім палацы кіраўніка сірыйскага Апазыцыйнага хаўрусу Ахмэда Мваса аль-Хаціба. Францыя прызнала гэты хаўрус прадстаўніком сірыйскага народу і дзяржавы. У Парыжы цяпер будзе працаваць амбасадар ад Апазыцыйнага хаўрусу.

Наш камэнтар: Дзяржавы прызнаюць сірыйскую апазыцыю, таму што сірыйскі народ змагаецца за сваё вызваленьне ад дыктатуры. І таму, што лідэры апазыцыі — сапраўдныя змагары, а не псэўдадзеячы, што жывуць на чужыя гранты. У Сірыі не прайшлі мясцовыя мілінкевічы, вінцучкі ды саньнікавы.

17 лістапада 2012 г. нідэрляндская газэта “De Telegraaf” напісала пра пачатак дзіцячых перадкалядных сьвятаў. Дзеці зьбіраюцца і бавяцца каля акцёраў у касьцюмах Sint (Сьвятога, як нідэрляндцы называюць сьв. Міколу). Гэтай традыцыі ўжо многія сотні гадоў.

Наш камэнтар: У акупаванай Беларусі паўсюль рыхтуюцца арміі “дедов морозов”. Савецка-русіфікатарскі сурагат на чужой мове павінен замяніць традыцыйныя калядныя сьвяты беларускай дзятве. Акупанцкі шабас. Але ён ня будзе вечным.

17 лістапада 2012 г. бэльгійская газэта “La libre Belgique” абмяркоўвае апошнія падзеі ў расейскіх вярхах. Пуцін правёў кампанію звальненьняў у вышэйшых і рэгіянальных эшалёнах улады. Быў адпраўлены ў адстаўку і міністар абароны Сердзюкоў, бо надта блізкія да яго чыноўнікі зь міністэрства абароны сталіся пэрсанажамі карупцыйных скандалаў. Усе пытаюцца, чаму Пуцін робіць гэта.

Наш камэнтар: Беларускія патрыёты мяркуюць, што ідзе чарговая ператасоўка кадраў у крамлёўскім гангу. Цікава, што на пастарунак міністра абароны прызначылі пажарніка па прафэсіі Шайгу. Крэмль усё ж вельмі баіцца прафэсійных вайскоўцаў, якія не задаволены гэбоўскім цараваньнем у Расеі. Але канчатковай разьвязкі на мафійным полі ў Маскве ім ня ўдасца пазьбегнуць.

17 лістапада 2012 г. швэдская газэта “Dagens Nyheter” напісала пра кінафэстываль у Стакгольме. Дождж узнагародаў прасыпаўся на фільм “Лорэ” рэжысёркі аўстралійскага паходжаньня Кэт Шотланд. Лірычны фільм прысьвечаны жыцьцю мірнага насельніцтва ў разбомбленай Нямеччыне пасьля ІІ Сусьветнай вайны.

Наш камэнтар: Нямецкае мірнае насельніцтва панесла цяжкія страты ў выніку бамбардовак і ваенных дзеяньняў на тэрыторыі Трэцяга Райху. Жыць немцам у разбомбленай краіне было вельмі цяжка. Але ня трэба забывацца, зь якім захапленьнем гэтае насельніцтва вітала свайго вар'ята Гітлера. І таксама тое, хто атакаваў, бамбіў і забіваў насельніцтва эўрапейскіх народаў. Нямногія разумныя немцы папярэджвалі грамадзтва, чым скончыцца нацыстоўскі экспэрымэнт, але іх не хацелі слухаць, крычалі “Хайль Гітлер!” Нешта падобнае назіраецца цяпер у Расеі, імпэрыі ачмурэлага шавінізму і гуманітарнай катастрофы для мільёнаў людзей.

17 лістапада 2012 г. славацкая газэта “Hospodarske Noviny” напісала пра падзеі лістапада 1989 г. Пасьля “аксамітнай рэвалюцыі” 17 лістапада 1989 г. на працягу некалькіх дзён з аб'ектаў СтБ (чэхаславацкага КГБ) у Славакіі грузавікамі вывозіліся дакумэнты ў чорных мяхах для ліквідацыі. Цяпер гэтыя падзеі аналізуюцца ў Інстытуце нацыянальнай памяці ў Браціславе.

Наш камэнтар: Пасьля падзеньня лукашызма беларусы не павінны дапусьціць, каб нешта вывозілася з з аб'ектаў КГБ РБ.