ЗАМЕЖНЫ ДРУК (04.07.2012)

4 ліпеня 2012 г. аўстрыйская газэта “Der Standard” паведаміла пра падзеі ў Кіеве. Тысячы людзей біліся з спэцчасткамі паліцыі ў цэнтры Кіева. Яны пратэставалі супраць прыняцьця Вярхоўнай Радай закону аб наданьні адміністрацыйнага статусу расейскай мове. Дэманстранты сарвалі прэс-канфэрэнцыю, на якой павінен быў выступіць прэзыдэнт Януковіч. На здамках у газэце — акрываўлены твар паліцмана, украінцы кідаюцца на чорны паліцэйскі натоўп у чорных шлемах.

Наш камэнтар: Ужо вядома, што на абарону роднай мовы падымаюцца Львоў і ўся Заходняя Украіна. Пачынаецца новы этап барацьбы супраць маскалізацыі Украіны. А папярэджвалі беларускія патрыёты, якім шляхам пойдзе кліентскі рэжым Масквы ва Украіне — шляхам лукашыстаў.

4 ліпеня 2012 г. швайцарская газэта “Neue Zuercher Zeitung” паведаміла, што адна швэдская агенцыя Public-Relations раскідала над Менскам шмат надзьмутых мядзьведзікаў, “каб надаць мужнасьці беларускай апазыцыі ў барацьбе супраць прэзыдэнта Лукашэнкі”.

Наш камэнтар: Нічога надзьмутага жыхары сталіцы над сабой ня ўбачылі. У сувязі з швэдскім мобам-шмобам хацелася б сказаць гэтым эўрадурачкам, каб яны адчапіліся ад беларусаў ды не аплочвалі дзейнасьць усялякіх падстаўных блазнаў у Швэцыі і Беларусі.

4 ліпеня 2012 г. нідэрляндская газэта “De Telegraaf” напісала пра зварот заходніх краінаў да Масквы са спасылкай на расейскую газэту “Коммерсант”. Заходнія лідары прапануюць, каб Расея прыняла сірыйскага прэзыдэнта Асада на выгнаньне. Гэта паспрыяла б урэгуляваньню сірыйскага крызісу.

Наш камэнтар: Выдатная ідэя — усіх міжнародных злачынцаў у Маскву! Там ім і месца.

4 ліпеня 2012 г. бэльгійская газэта “De Standaard” напісала пра традыцыйны гістарычны карнавал у Брусэлі. 1400 акцёраў у гістарычных строях 16-га стагоддзя запоўнілі сабой плошчу перад ратушай. На здымках у газэце — радасныя твары дзяцей і дарослых, якія далучыліся да гістарычнай традыцыі.

Наш камэнтар: Лукашысты ў сваю чаргу запрапанавалі беларусам свой савецкі “карнавал” з танкамі, маскоўскімі казакамі, дзікай расейскай папсой, пачварнай і нахабнай хлусьнёй з высокай трыбуны. У нармальных краінах адраджаюць нацыянальныя традыцыі, у Беларусі працягваюць вычвараць народную душу русіфікатарскім маразмам.

4 ліпеня 2012 г. славацкая газэта “SME” напісала з Каіра. Там сабраліся на канфэрэнцыю прадстаўнікі розных апазыцыйных груповак з Сірыі. Кофі Анан патрабаваў, каб быў утвораны кааліцыйны ўрад з удзелам Башара Асада. Апазыцыя адкінула гэты праект. Канфэрэнцыю пакінулі прадстаўнікі сірыйскіх курдаў пасьля таго, як сірыйцы адмовіліся прыняць пункт пагадненьня, паводле якога курды прызнаюцца адмысловым народам з сваёй мовай, культурай і рэлігіяй. Пасьля гэтага ў асяроддзі апазыцыянэраў пачаліся бойкі. Адміністрацыя гатэлю, дзе адбывалася канфэрэнцыя, тэрмінова загадала выносіць з хола сталы і крэслы, каб імі не біліся палітыкі.

Наш камэнтар: Самы сірыйскія прадстаўнікі прызнаюць, што гэтыя падзеі не надаюць аўтарытэту апазыцыі на міжнароднай арэне. Але і ў гэтых падзеях ёсьць нюансы.

Той, хто бачыў паседжаньні “абяднанай апазыцыі” у Менску ў 1999-2002 гг., той ніколі не забудзецца на гэтыя спэктаклі “грантаўскага адзінства”. Лебедько, Вячорка і іншыя ціха-мірна сядзелі за сталом у нямецкім цэнтры IBB на ўскраіне Менску. Рэй вёў начальнік групы АБСЭ ў Менску Ганс-Георг Вік. Нямецкі шпіён абвяшчаў праз перакладчыка: “Заўтра адбудзецца сустрэча прадстаўнікоў апазыцыйных партыяў з спонсарамі. Сардэчна запрашаем...” Усе пачыналі весела ёрзаць у крэслах. Генсек кампартыі С. Калякін нясьмела падымаў руку і пытаўся: “Господін Вік, а комуністы тоже могут прідті?” Вік лагодным тонам, па-бацькоўску супакойваў вернага ленінца: “Безумоўна, містэр Кальякін, кампартыя ж падпісала агульную плятформу апазыцыі...” Мелася на ўвазе грантаўская згода псэўдаапазыцыі на ўдзел у чарговых псэўдавыбарах Лукашэнкі. Вось гэта была гармонія ўсіх груповак! Усім хапала халяўных эўрагрантаў на падтрымку антычалавечага рэжыму.

Бачна, што ў сірыйцаў адбываецца сапраўдная, а не грантаўская барацьба.