ЗАМЕЖНЫ ДРУК (28.02–01.03.2012)

28 лютага 2012 г. славацкая газэта “Pravda” напісала з Сірыі. Паўстанцы вывезьлі параненага брытанскага журналіста Пола Канроя з горада Хомса ў Ліван. У апэрацыі вырытаваньня ўдзельнічала 35 дабраахвотнікаў, 13 зь якіх загінулі, ратуючы журналіста з блакады.

Наш камэнтар: Змагары ахвяраваліся жыцьцём і здароўем, каб выратаваць чужога журналіста, таму што ён рызыкаваў і паведамляў у сьвет праўду пра трагедыю сірыйскага народу.

Мяркуем, што ніхто з беларускіх патрыётаў не ахвяраваўся б нічым дзеля пісальнікаў і пачобутаў, якія на працягу гадоў хлусяць у польскіх газэтах пра беларускую трагедыю. Беларусы не шануюць хлусоў і фальшывых “герояў”.

29 лютага 2012 г. нарвэжская газэта “Aftenbladet” пісала пра Беларусь з нагоды высылкі рэжымам польскага амбасадара і амбасадара Эўразьвязу, да якіх далучыліся іншыя амбасадары ЭЗ. Газэта цытуе міністра замежных справаў Нарвэгіі Ёнаса Гара Сьцёрэ: “Нарвэгія вельмі засмучана апошнімі падзеямі ў Беларусі. Цяжка ўявіць сабе, што гэта можа прынесьці краіне карысьць. Беларусь самаізалюецца ад Эўропы і сьвету і наносіць шкоду ўласнаму палітычнаму і эканамічнаму разьвіцьцю”.

Наш камэнтар: Гэтыя зноў пра “самаізаляцыю Беларусі”. Зноў паўтараюць пра “беларускі рэжым”. Заходнія профі-палітыкі ня здольныя ўбачыць, што за беларускай нацыянальнай трагедыяй стаіць імпэрская Масква, якая кіруе працэсамі ізаляцыі і зьнішчэньня. Заходнікі ў той жа час прызнаюцца, што на патрабаваньне Масквы дапусьцяць лукашыстоўскі рэжым да перамоваў у рамках Эўропа — “мытны саюз Расея-Беларусь-Казахстан. Профі ідуць па старой дарожцы фальшу і тупізма.

29 лютага 2012 г. славацкая газэта “SME” пісала пра дзеячаў расейскай культуры, якія выступаюць у перадвыбарчай кампаніі за і супраць Пуціна. Пасьля пералічэньня прапуцінскіх газэта піша, што Ала Пугачова агітуе за маладога алігарха Прохарава, а рокер Юры Шаўчук за дэмакратычную апазыцыю.

Наш камэнтар: Пачытаць маскоўскія плёткі славакам мабыць цікава. А беларусы ўжо ведаюць, што згаданыя дзеячы культуры агітуюць за адно адзінае — за тое, каб “дорогіе россіяне” пасунуліся на выбарчыя ўчасткі і забясьпечылі “элегантную перамогу” Пуціну і ягонай хеўры. Беларусы ведаюць (на ўласным досьведзе), што зусім ня важна, за каго людзі будуць аддаваць на выбарчым фарсе свае галасы. Кантора запіша колькі трэба свайму “кандыдату”. Нешта ніхто з рокераў не засьпяваў пра байкот жульніцкім псэўдавыбарам. За гэта ня плоцяць.

29 сакавіка 2012 г. летувіская газэта “Lietuvos Rytas” напісала з Грузіі. Лідар Нацыянал-дэмакратычнай партыі Грузіі Гурам Чахвадзэ запатрабаваў, каб прэзыдэнт Саакашвілі склікаў на паседжаньне Раду нацыянальнай бясьпекі. Чахвадзэ заявіў, што кіраўніцтва краіны павінна адмовіцца ад адмены візавага рэжыму з Расеяй: “Безвізавы рэжым стварае пагрозу бясьпецы Грузіі. Мы ня ведаем, ці ва ўмовах бязвізавага рэжыму ў Грузію з Расеі будуць прыбываць ня толькі турысты, але і людзі, якія будуць пагражаць бясьпецы краіны”. Палітык выказаўся таксама пра расейскія інвэстыцыі ў Грузію: “Мы і так шырака адкрылі дзьверы на наш рынак для рускага капітала. Размовы аб тым, што трэба прыцягваць у Грузію дадатковы рускі капітал, нясуць пагрозу нашай эканоміцы. Калі мы прызнаем, што Расея зьяўляецца акупантам, то трэба меркаваць, што ў арсенале Расеі супраць Грузіі ёсьць патэнцыял выкарыстаньня ня толькі ўзброеных сілаў, але і прыхаваная эканамічная і палітычная агрэсія”.

Наш камэнтар: Словы мудрага палітыка-патрыёта. Для маскоўскага акупанта дзьверы нацыянальнай дзяржавы павінны быць зачыненымі.

1 сакавіка 2012 г. славацкая газэта “Hospodarske Noviny” напісала ў артыкуле “Пуцін прымусіў іх прызнацца, як сьцьвярджаюць расейскія СМІ”: “У расейскай прэсе пашыраюцца інфармацыі аб тым, што няўдалы тэракт супраць фаварыта прэзыдэнцкіх выбараў, Уладзіміра Пуціна замовіў сам прэм'ер. Сумніў у сапраўднасьці падрыхтаванага тэракту выказала газэта “Маскоўскія Навіны”, якая спаслалася на розных спэцыялістаў. На думку абаронцаў правоў чалавека няма сумніву, што расейская тайная служба катавала гэтых людзей. “Гэта зразумела, як толькі зірнуць на фота”, — цытуе расейская газэта Станіслава Дзімітрыеўскага з арганізацыі, якая займаецца праблемай катаваньняў. Той факт, што справа адкрылася за няпоўны тыдзень перад выбарамі, паводле многіх назіральнікаў, даказвае, што йдзецца аб заранёў прадуманым акце. Спроба тэракту павінна забясьпечыць Пуціну больш галасоў”.

Наш камэнтар: Атрымалася гэткае маскоўскае Лёзна (сфабрыкаваны КГБ “тэракт” супраць кандыдата Лукашэнкі ў 1994 годзе). Знаёмы почырк канторы. Дык калі почырк знаёмы, то і ня трэба хадзіць на псэўдавыбарчы фарс, пад які яшчэ ў дадатак катуюць людзей. Але ніхто з расейскай “оппозіціі” не гукаў пра Байкот. І тут паўтарылася пройдзенае ў акупаванай Беларусі.